Молитва преподобному алипию печерскому

Чудотворные слова: молитва преподобному алипию печерскому в полном описании из всех найденных нами источников.

Оглавление

1 Молитвы Преподобному Алипию Печерскому, иконописцу.
2 Преподо́бному Али́пию, иконопи́сцу Пече́рскому

Молитвы Преподобному Алипию Печерскому, иконописцу.

Преподобне отче Алипие! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.

О, священная главо, преподобне отче, преблаженне авво Алипие, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Тропарь Преподобному Алипию Печерскому

Зраки изобразуя святых на дщицах, сих благодеяния спешно, яко искусен художник, всехвальне Алипие, нарисовал еси на скрижалех твоего сердца и сего ради, аки образ, благолепне украшен, священства благодатию, аки златом, обложился еси от Христа Бога и Спаса душ наших.

Пустынный житель, и во плоти ангел, и чудотворец явился еси, Богоносне отче наш Алипие, постом, бдением, молитвою Небесная дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Алипие, отче наш, моли Христа Бога спастися душам нашим.

Боже отец наших, творяй присно с нами по Твоей кротости, не остави милость Твою от нас, но молитвами их в мире Управи живот наш.

От юности Божественное в себе имея начертание, вдан был еси в научение иконнаго писания; и внегда небеси подобная Богородицы писашася церковь, ты таможде пособствовал и видел еси Духа Святаго осияние, от Негоже приял еси чудес действо, яко иконы твоя чудотворяху, тем тя чтим и ублажаем, чудне Алипие.

Ублажаем тя, преподобне отче Алипие, и чтим святую память твою, наставниче монахов и собеседниче ангелов.

Икона Преподобному Алипию Печерскому, иконописцу

Преподо́бному Али́пию, иконопи́сцу Пече́рскому

Тропа́рь, гла́с 8:

Зра́ки изобразу́я святы́х на дщи́цах, си́х благодея́ния спе́шно, я́ко иску́сен худо́жник, всехва́льне Али́пие, написова́л еси́ на скрижа́лех твоего́ се́рдца, и сего́ ра́ди а́ки о́браз боголе́пно укра́шен, свяще́нства благода́тию а́ки зла́том обложи́лся еси́ от Христа́ Бо́га и Спа́са ду́ш на́ших.

Кано́н преподо́бному, глас 8.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Оби́тель Пече́рская, я́коже Боже́ственный ра́й, по́стников ли́ки процвете́, в не́й же возра́сл еси́, Али́пие преподо́бне, я́ко дре́во, насажде́нное при исхо́дищах во́д. Те́мже плоды́ стокра́тно стяжа́л еси́, я́ко изря́днейший.

Бо́жия наипа́че возлю́бль, мирски́м, о́тче, печа́лем ника́коже се́рдца твоего́ приложи́л еси́, по и́мени безпеча́лен сы́й, но при́сно ра́дуяся о Го́споде Спа́се, сла́вно преше́л еси́ злоко́зненную ми́ра пучи́ну.

Ре́вность го́рнюю прии́м, горе́ ди́вно восте́кл еси́, начерта́в, преподо́бне, стремле́нием го́рним, вопреки́ до́льнему пло́ти тече́нию, побе́дное ору́жие — Кре́ст, взе́м кре́ст сво́й и гряды́й всле́д Го́спода, поя́ пе́снь побе́дную.

Богоро́дичен: Ааро́нов прозя́бший же́зл и Боже́ственный престо́л, на не́мже все́де Христо́с, и небе́сный хра́м, и́же Влады́ку на́м яви́, и́мамы Тя́, Де́во Пречи́стая: не преста́й спаса́ющи ны́, да пе́снь воспое́м побе́дную.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

За́поведи Христо́вы, я́ко тве́рдый ка́мень, положи́ в основа́ние преподо́бный, на не́м же поста́вив свои́ но́зе благоче́стия, ро́ва страсте́й и треволне́ний де́монских избеже́ ди́вно.

Умныя си́лы подража́я, о́тче, ле́ствицу у́мнаго восхожде́ния в се́рдце твое́м де́тельне утверди́л еси́, вопия́ Христу́: па́че Тебе́ не́сть свя́та, Человеколю́бче.

Благода́ть сугу́бу име́еши у Го́спода, Ему́же предстои́ши, всехва́льне, помоли́ся о на́с, во е́же и на́м прия́ти го́рнейшее блаже́нство от Христа́ Влады́ки, избе́гнув мно́гих бе́д и де́монских искуше́ний.

Отрок сы́й, преди́вне, худо́жней хи́трости вда́н бы́л еси́ поучи́тися, но го́рнейшаго худо́жества бы́л еси́ жела́нием уловле́н, о́бразы доброде́телей на скрижа́лех се́рдца твоего́ живопису́я.

Богоро́дичен: Живота́ Влады́ку и Творца́ ро́ждшая, Еди́наго предве́чнаго Спа́са, Блага́я, Того́ моли́ за при́сно вопию́щия Ти́, да спасе́т на́с, я́ко Еди́н Пребла́г и Человеколю́бец.

Седа́лен, гла́с 1, подо́бен: Гро́б Тво́й, Спа́се.

О, блаже́нне, ка́ко сле́зными тече́нии се́рдце твое́ напая́л еси́, е́же ороша́я оби́льно, плодоно́сно яви́л еси́ доброде́тельми, сего́ ра́ди го́рнейшее жи́тельство прия́л еси́ от Го́спода, к нему́ же, преподо́бне, дерзнове́нно за ны́ предста́тельствуй.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ико́ннаго худо́жества свы́ше восприи́м да́р, хра́мы, о́тче, небоподо́бно украси́л еси́, я́коже Веселеи́л дре́вле, твою́ же непоро́чную ду́шу, доброде́тельми приле́жно украша́я, хра́м Ду́ха Свята́го соде́лал еси́.

Юность нескве́рну Го́споду, я́ко да́р перворо́дный, без поро́ка, в же́ртву прине́сл еси́, те́мже и от Христа́, о́тче, свяще́нства да́ром обле́клся еси́, да Тому́ та́инственное непоро́чно жертвоприно́сиши благодаре́ние.

Алчбою же и жа́ждею и труды́ безме́рными кре́пость пло́ти, блаже́нне, не щаде́л еси́, во е́же ду́ха кре́пости яви́тися. Те́мже и чудотворе́ния да́р от Христа́ прия́л еси́ е́же цели́ти ду́ш и теле́с не́мощь к тебе́ приходя́щих.

Любо́вь боже́ственную, я́же е́сть соу́з соверше́нства, в се́рдце твое́м, преподо́бне, стяжа́в у́бо де́тельне, доброде́телей ве́рх показа́л еси́, те́мже преди́вный к Бо́гу бу́ди хода́тай, вы́ну моля́ о на́с Человеколю́бца.

Богоро́дичен: Ипоста́снаго Сло́ва непоро́чно ро́ждшая, пре́жде ве́к от Отца́ ро́ждшагося, умоли́ Того́, Де́во, от напа́стей злы́х изба́вити на́с, да жите́йскую преплы́вше пучи́ну, Ца́рствие небе́сное улучи́м вско́ре.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Прокаже́нна, прише́дша к тебе́, подража́тельно Христу́, исцеля́еши, о́тче, смеше́нием худо́жным лица́ сокры́в безобра́зие, и ко иере́ем умы́тися того́ посла́в, отню́д людски́я бе́гая сла́вы.

Иису́су, живота́ Нача́льнику, ве́сь от ю́ности живо́т сво́й предаде́ Али́пий, разуме́ бо тщету́ и пре́лесть ми́ра жите́йскаго. Те́мже приле́жно ко све́ту за́поведей Христо́вых стопы́ своя́ и се́рдце напра́ви.

Еди́наго Христа́ предзря́, к Тому́ Ангельски восте́кл еси́, преподо́бне, житие́м разу́мно, умо́м же целому́дренно, творя́ восхо́д сво́й. Те́мже Ца́рство го́рнейшее прия́л еси́, да Ангелом слику́еши при́сно.

Ве́рнии, слику́юще дне́сь, притеце́м у́бо к Али́пию, зову́ще: преблаже́нне о́тче, моли́ся вы́ну ко Го́споду, да укрепи́т на́с и к све́ту за́поведей Свои́х преди́вно но́ги на́ша напра́вит.

Богоро́дичен: Отцу́ сопресто́льное Сло́во, пре́жде ве́к от Него́ ро́ждшееся безле́тно, Преблага́я Де́во, ди́вно родила́ еси́ пло́тию, Иже от ве́ка Тя́ Де́ву чи́стую избра́, да на́с спасе́т от кля́твы Тобо́ю.

Ирмо́c: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Моли́твою и воздержа́нием мудрова́ние пло́ти увяди́в, в животво́рную ме́ртвость обле́клся еси́, вопия́ с Па́влом боже́ственным: не ктому́ у́бо живу́ а́з, но живе́т во мне́ Христо́с, Спа́с мо́й.

Небла́зненно сверша́я ше́ствие, трудолю́бно на ра́ло ру́це возло́жь, ми́ра вспя́ть ника́коже назира́л еси́, разжиза́емь к Бо́гу любо́вию, те́мже ра́дуешися ны́не, дости́г Ца́рствия Христо́ва.

Ежде́нию Илиину́, е́же на не́бо, уподо́бися восхо́д тво́й, Али́пие, колесни́цу бо о́гненную доброде́телей усе́рднейшим тща́нием состро́ив и впря́г о́гненныя ко́ни — ре́вность и ве́ру, небесе́ сла́вно дости́гл еси́.

Богоро́дичен: Очи́стити хотя́ Ада́мов гре́х, предъизбра́ Тя́ еди́ну Де́ву Христо́с, да Тобо́ю сни́дет к на́м, Пречи́стая, свобожда́я ле́сти лука́ваго. Те́мже мо́лимся Тебе́ Де́во: от гре́х вся́ко огради́ ны.

Конда́к свята́го, гла́с 2:

От ю́ности Боже́ственное в себе́ име́я начерта́ние, вда́н бы́л еси́ в науче́ние ико́ннаго писа́ния; и внегда́ небеси́ подо́бная Богоро́дицы писа́шеся це́рковь, ты́ та́можде посо́бствовал еси́, и ви́дел еси́ Ду́ха Свята́го осия́ние, от Него́же прия́л еси́ чуде́с де́йство, я́ко ико́ны твоя́ чудотворя́ху. Те́м тя́ чти́м и ублажа́ем, чу́дне Али́пие.

Юже це́ркве Пече́рския, небеси́ подо́бную, красоту́ узре́в, преподо́бне, первообра́зныя и го́рнейшия красоты́ наслади́тися и небе́снаго жи́тельства разже́глся еси́ жела́нием, и ю́ношески Ангельскому житию́ поревнова́в, боже́ственными доброде́тельми потща́лся еси́ ду́шу твою́ украша́ти: посто́м и бде́нием, труды́ и ми́лостынею, и моли́твою непреста́нною, да все́льник го́рнейшия Це́ркве яви́шися, иде́же с Ангельскими ли́ки Святе́й Тро́ице ны́не предстои́ши за чту́щия тя́ вы́ну предста́тельствуя. Те́м тя́ чти́м и ублажа́ем, чу́дне Али́пие.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Бо́жиею десни́цею о́браз Влады́чицы ви́дев начерта́н, та́же Ду́ха Бо́жия, я́ко го́лубя в це́ркви лета́юща, сла́вно воспе́л еси́, со и́ноки взыва́я: благослове́н еси́ Бо́же, оте́ц на́ших.

Напа́сти хитросплете́нныя, я́же лука́вый, я́ко се́ти, распростре́, трудолю́бно ве́рою и смире́нием низложи́в, о́тче, того́ ловле́ния избе́гл еси́, взыва́я: благослове́н еси́, Бо́же, оте́ц на́ших.

Область миродержи́теля, о́тче, Боже́ственною си́лою попра́в, того́ зло́бу низве́ргл еси́, доброде́тельми препобежда́я. Ны́не же, го́рняя насле́довав, пое́ши: благослове́н еси́, Бо́же, оте́ц на́ших.

Верою любому́дрствуя, ско́рбным и те́сным путе́м ше́ствовал еси́, те́мже две́ри ра́йския расшири́шася тебе́ пресла́вно, иде́же пра́зднственно лику́еши, взыва́я: благослове́н еси́, Бо́же, оте́ц на́ших.

Богоро́дичен: Иже от невеще́ственных пло́ть челове́чу восприя́л е́сть от Тебе́, да спасе́т ны́, Чи́стая, животво́рныя подая́ то́ки, и сродни́в пло́тию себе́, песнопою́щих: благослове́н еси́, Бо́же, оте́ц на́ших.

Ирмо́с: Седмери́цею пе́щь, халде́йский мучи́тель Богочести́вым неи́стово разжже́, си́лою же лу́чшею, спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Терпели́вным путе́м гряды́й всле́д Влады́ки, кре́ст трудолю́бно на ра́мена прии́м, Ца́рствия небе́снаго дости́гл еси́ пресла́вно, иде́же Соде́телю все́х вопие́ши: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Иже па́мять твою́ творя́щии, о́тче, я́ко преди́вна во и́ноцех тя́ зри́м, о́браз возхожде́ния на́м де́тельне яви́вша. Те́м же ны́не Влады́це научи́ взыва́ти: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Светоза́рным венце́м венча́ тя Влады́ка, до́брым бо по́двигом тече́ние сконча́в, ду́шу доброде́тельми сверши́л еси́ прему́дро. Те́м же ны́не Изба́вителю вопие́ши: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Богоро́дичен: Яко сте́ну в беда́х, и ве́рную по́мощь и преблагу́ю засту́пницу о на́с ве́мы Тя́, Пречи́стая. Те́м же мо́лим Ти ся вы́ну: спаси́, о Влады́чице, от злоключе́ний, ко́зней бесо́вских и зло́бы, да ве́рно вопие́м Ти́: ра́дуйся, Чи́стая Де́во, во вся ве́ки.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Многопе́сненно слику́им и досто́йно Али́пия почти́м, вознесе́м Боже́ственный свети́льник я́ве, да све́тит все́м сла́дость преди́внаго жития́, возвы́сим небе́сный кри́н, по́стническую воню́ на́м преизря́дно благоуха́ющ.

Огнезра́чному престо́лу, с ли́ки по́стников ны́не предстоя́й, не преста́й моли́тися о на́с ко Спа́су, Али́пие о́тче, изря́дная похвало́, небе́сных сожи́телю, до́льныя не оставля́й, да тебе́ пе́сненно возвели́чим.

Лико́м Ангельским ревну́я, о́браз Ангельский ю́н сы́й восприя́л, на земли́ же Ангельски пожи́в преди́вно, престо́лу Влады́чню со Ангелы ны́не предстои́т. Те́мже к Али́пию с ве́рою припаде́м, прося́ще о на́с моли́тися непреста́нно.

Богоро́дичен: Из Тебе́, Отрокови́це, произы́де неизрече́нно безсе́менно Госпо́дь, Иже Тя́ засту́пницу яви́ на́м ди́вну, благу́ю наде́жду, помо́щницу на враги́. Те́мже у́бо предста́тельствуй ми́лостивому Царю́ за вопию́щия к Тебе́ вы́ну.